Prishtinë, 08 prill 2016 – Me ftesë të kryetarit të Gjykatës Supreme, Prof. Ass. Dr. Fejzullah Hasani, në Kosovë po qëndron një delegacion i Gjykatës së Lartë të Shqipërisë, në krye me kryetarin e kësaj gjykate, z. Xhezair Zaganjori.
Krerët e të dy institucioneve kanë diskutuar për vendimet unifikuese, me theks në sfidat e të dyja vendeve, duke shkëmbyer njëkohësisht përvoja të vlefshme mes vete.
Të dy kryetarët theksuan rëndësinë e bashkëpunimit të ndërsjelltë duke potencuar se roli i institucioneve që drejtojnë, para së gjithash është të prodhojnë drejtësi, veçmas nëpërmjet vendimeve unifikuese që japin këto gjykata si instanca të fundit.
Gjatë ditës, delegacioni shqiptar i shoqëruar nga nikoqiri, kryetari Hasani, kanë vizituar Gjykatën Kushtetuese, ku janë pritur nga kryetarja Arta Hajrizi, më pas është vizituar Kryesuesi i Këshillit Gjyqësor të Kosovës, z. Nehat Idrizi, ndërkohë që pasdite delegacioni ka vizituar Gjykatën Themelore në Gjilan, si një nga gjykatat që shquhet për efikasitet në zgjidhje të lëndëve.
