Nesrin Lushta

Nesrin Lushta ishte gjyqtare e Gjykatës Supreme të Kosovës. Ka diplomuar në Fakultetin Juridik të Universitetit të Prishtinës më 1982. Në vitin 1982 deri më 1983, ka qenë praktikante në Prokurorinë Publike të Qarkut në Mitrovicë. Më 1983 deri më 1984, është angazhuar si bashkëpunëtore profesionale në Gjykatën e Qarkut në Mitrovicë. Në vitin 1984 është emëruar gjyqtare në Gjykatën e Qarkut në Mitrovicë, ku ka punuar deri në vitin  1992, kur është larguar nga puna nga regjimi serb i asaj kohe. Ndërsa, nga viti 1992 deri më 1998, ka ushtruar profesionin e avokates. Në vitet 2000 – 2001 ka punuar si gjyqtare në Gjykatën e Qarkut në Mitrovicë. Në periudhën 2001 – 2004 ka qenë bashkëdrejtuese në Institutin Gjyqësor të Kosovës. Ka qenë anëtare e Këshillit Gjyqësor dhe Prokurorial të Kosovës nga viti 2004 deri më 2006. Në periudhën prej 2004 deri më 2008 ka punuar si gjyqtare në Gjykatën e Qarkut në Mitrovicë. Në vitin 2005 ka qenë konsultante e fondacionit zviceran Terre des Hommes në Prishtinë në shumë projekte, e posaçërisht në atë lidhur me fëmijët në konflikt me ligjin. Gjithashtu, ka qenë eksperte ndërkombëtare në projektin e  AER  “Ndihma teknike për themelimin e institutit për trajnimin e gjyqtarëve dhe prokurorëve” në Shkup/Maqedoni, ku ka përgatitur dhe udhëhequr disa pilot trajnime. Prej vitit 2007 deri më 2008 ka qenë konsultante e UNICEF-it në projektin e drejtësisë për të mitur. Në periudhën 2006 – 2010, ka qenë sekretare gjenerale e asociacionit ndërkombëtar për gjyqtarë dhe magjistratë për të rinj dhe të familjes, me seli në Zvicër. Prej vitit 2008 është  gjyqtare në Gjykatën Supreme të Kosovës. Nga viti 2009 deri më 2010, ka qenë kryetare e Komisionit Qendror të Zgjedhjeve të Kosovës. Më 16.02.2010, nga Presidenti i Republikës është dekretuar gjyqtare e Gjykatës Supreme të Kosovës. Znj. Lushta ka marrë pjesë në disa vizita studimore dhe konferenca profesionale në disa shtete të Evropës dhe Azisë, lidhur me të drejtat e njeriut dhe sundimin e ligjit, programet trajnuese për gjyqtarë dhe prokurorë, për sistemin gjyqësor, mbrojtjen e dëshmitarëve, kodet penale të Kosovës. Nga viti 2001 ka ligjëruar në projekte të shumta në Institutin Gjyqësor të Kosovës, Odën e Avokatëve, OSBE, Këshillin e Evropës, ABA/CEEL dhe të tjerë, kryesisht për procedurën penale dhe sistemin e drejtësisë për të mitur. Gjithashtu, ka qenë e kyçur në draftimin e Kodit për të mitur të Kosovës. Ka përfunduar disa kurse për trajnimin e trajnerëve të organizuara në Kosovë, Bullgari dhe Maqedoni. Është trajnuese në Institutin Gjyqësor të Kosovës.

Përveç gjuhës shqipe, flet edhe gjuhën angleze, serbe dhe turke.