Erdogan Haxhibeqiri

Erdogan Haxhibeqiri është gjyqtar i Gjykatës Supreme. Më 1981 ka kryer Fakultetin Juridik në Universitetin e Prishtinës. Nga viti 1982–1983 ka qenë praktikant në  Avokaturën Publike Komunale  në Prizren. Gjatë vitit 1983, ka punuar si bashkëpunëtor profesional në Avokaturën Publike Komunale në Prizren. Më 1983 deri më 1986, ka qenë zëvendës i Avokatit Publik Komunal në Prizren. Në periudhën 1986 - 1988 ka punuar si gjyqtar në Gjykatën Komunale në Prizren. Nga viti 1988 ka qenë gjyqtar në Gjykatën e Qarkut në Prizren, deri më 1992, kur edhe është larguar nga puna nga pushteti serb. Në vitet 1993 – 1999 është angazhuar si avokat në Prizren. Prej janarit 2000 është rikthyer si gjyqtar në Gjykatën e Qarkut  Prizren deri më 2011. Me dekretin DGJ – 004 – 2011, të datës 11.08.2011, nga Presidentja e Republikës është dekretuar gjyqtar  i Gjykatës Supreme të Kosovës. Z. Haxhibeqiri është një ndër themeluesit e Shoqatës së Gjykatësve të Kosovës dhe kryetar i kësaj shoqate për degën regjionale të Prizrenit. Prej vitit 2000 në vazhdimësi është pjesëmarrës në seminare të organizuara nga Instituti Gjyqësor i Kosovës  dhe si ligjërues në temat nga lëmi civile që kanë të bëjnë me rregulloret e reja për hipotekën dhe pengun në sendet e luajtshme dhe tema të tjera. Nga viti 2006 është i angazhuar si ligjërues  në seminare të organizuara nga Shoqata e Gjykatësve të Kosovës  në temat për drejtat e njeriut në bazë të Konventës Evropiane për të Drejtat e Njeriut. Gjithashtu, është trajnues i  licencuar  për të Drejtën Evropiane.  Gjithashtu, është ligjërues për çështjet nga praktika gjyqësore për  organizatat joqeveritare në territorin e Kosovës. Është trajnues në programin fillestar për arsimimin e kandidatëve për gjyqtarë si dhe në arsimimin vazhdueshëm të tyre.

Përveç gjuhës shqipe, flet edhe gjuhën turke, serbe, boshnjake dhe mesatarisht atë angleze.