Rasim Rasimi

Rasim Rasimi është gjyqtar i Gjykatës Supreme. Ka diplomuar në vitin 1985 në Fakultetin Juridik, Universiteti i Prishtinës. Me 22 maj të vitit 2013 mori titullin Master i Shkencave Juridiko-Penale. Provimin e Jurisprudencës e kreu në vitin 1990, pasi mbaroi praktikën profesionale në Gjykatën Themelore në Lubjanë - Republika e Sllovenisë, gjatë viteve 1988-1990. Nga viti 1992 deri në vitin 2000, ishte sekretar shkolle në Drejtorinë e Arsimit të Kuvendit Komunal të Gjilanit. Në vitin 2000, u emërua gjyqtar në Gjykatën Komunale të Gjilanit, funksion të cilin e ushtroi deri në vitin 2010. Nga mesi i vitit 2010, deri në fund të vitit 2012, punoi si gjyqtar në Gjykatën e Qarkut në Gjilan. Ndërsa nga 1 janari i vitit 2013 ishte gjyqtar në Gjykatën e Apelit të Kosovës, në Departamentin për të Mitur. Në shkurt të vitit 2018 u dekretua gjyqtar i Gjykatës Supreme.

Trajnues në ish-Institutin Gjyqësor të Kosovës, përkatësisht në Akademinë e Drejtësisë, në programin për Arsimim të Vazhdueshëm për gjyqtarë dhe prokurorë, në fushën e drejtësisë për të mitur.

Një ndër autorët e hartimit të Modulit për Drejtësinë për Fëmijë, e botuar në vitin 2012 nga Instituti Gjyqësor i Kosovës.

Pjesë e grupit punues në draftimin e Kodit për të Mitur, të Kosovës. Pjesëmarrës në një numër të madh të konferencave, trajnimeve, seminareve dhe vizitave studimore me karakter ndërkombëtar, ku janë trajtuar tema të drejtësisë penale, drejtësisë për të mitur si dhe aspekte të tjera në mbrojtjen dhe avancimin e të drejtave dhe lirive themelore të njeriut.

Përpos gjuhës shqipe (amëtare) flet edhe serbisht dhe sllovenisht.