Kryetari Peci, sqaroi para të pranishmëve hapat që janë planifikuar dhe që po ndërmerren për revidimin e Udhëzuesit të Përgjithshëm për Politikë Ndëshkimore, duke qartësuar se krahas komenteve dhe vërejtjeve që presin nga përfaqësuesit e shoqërisë civile, një iniciativë e re synon të përfshijë politikën ndëshkimore edhe në kurrikulën e Fakultetit Juridik të Universitetit të Prishtinës.

Kreu i Gjykatës Supreme bëri me dije për të pranishmit se Komisioni, krahas revidimit të Udhëzuesit në harmoni me Kodin e ri Penal, ka për qëllim të evidentojnë edhe aspektet që aktualisht po paraqesin vështirësi për zbatim. Në këtë drejtim, kanë nisur takimet e Komisionit me gjyqtarë dhe prokurorë në të gjitha gjykatat themelore të Kosovës, ku po evidentohen paqartësitë eventuale që kanë penguar zbatimin e Udhëzuesit, qoftë nga ana e gjyqtarëve apo e prokurorëve.

Sikurse në hartimin e Udhëzuesit, ashtu edhe në revidim, Gjykata Supreme mbështetet nga Ambasada Amerikane në Prishtinë. Në fjalën e tij para të pranishmëve, John Hanley, këshilltar ligjor rezident nga Ambasada Amerikane, Departamenti i Drejtësisë, pohoi mes tjerash, se Kosova po merret shembull nga rajoni sa i përket Udhëzuesit për Politikë Ndëshkimore, për çka edhe mund të krenohet si vend.

Gjatë takimit, profesori i Fakultetit Juridik të UP-së, Haki Demolli, theksoi gatishmërinë e Katedrës Penalo-Juridike, për të përfshirë politikën ndëshkimore në syllabuset e nivelit Bachelor dhe atij Master të studimeve, por edhe bashkëpunimin në aspekte tjera studimore.

Përfaqësuesit e shoqërisë civile, krahas zërit kritik, me theks për mungesën e

arsyetimeve të duhura të aktgjykimeve, theksuan edhe nevojën që Udhëzuesi të bëhet i obligueshëm, pasi vetëm në këtë mënyrë mund të përmirësohet cilësia e aktgjykimeve dhe matja e dënimeve.

Përveç anëtarëve të Komisionit Konsultativ për Politikë Ndëshkimore, përfaqësuesve të Ambasadës Amerikane, profesorëve nga UP, të pranishëm nga shoqëria civile ishin përfaqësues nga BIRN, IKD, GLSP, ROLAG dhe CLARD.