Prishtinë 23 nëntor 2017 – Nën udhëheqjen e kryetarit të Gjykatës Supreme, Enver Peci, sot është mbajtur seanca e përgjithshme, në të cilën kanë marrë pjesë, përveç gjyqtarëve të Supremes, edhe gjyqtarët vendorë e ndërkombëtarë të Dhomës së Posaçme të Gjykatës Supreme (DhPGjS), ata nga Kolegji i Apelit dhe gjyqtarët e Supremes nga EULEX-i.
Të pranishmit kanë diskutuar rreth propozimeve për Projektligjin për Këshillin Gjyqësor të Kosovës, për Projektligjin për Gjykatat dhe Projektligjin për Përgjegjësinë Disiplinore të Gjyqtarëve.
Kreu i Supremes, u sqaroi të pranishmëve se Këshilli Gjyqësor i Kosovës, ka kërkuar nga Gjykata Supreme që deri të hënën të jap propozimet, komentet dhe vërejtjet eventuale rreth këtyre draft-ligjeve. Mirëpo, të gjithë të pranishmit theksuan se ky afat i shkurtër kohor është i pamjaftueshëm për të analizuar këto draft-ligje. Madje gjyqtarët e EULEX-it nuk kishin pranuar version në gjuhën angleze të materialit, ndaj konsideruan se afati shtesë është i domosdoshëm.
Në parim, gjyqtarët e Gjykatës Supreme, potencuan se nga analizimi i shkurtër i këtyre draft-ligjeve, vërejtjet janë substanciale.
Gjyqtarët vendorë dhe ata ndërkombëtarë u dakorduan që, kryetari i Gjykatës Supreme t’i drejtohet Këshillit Gjyqësor të Kosovës, ku përveç afatit shtesë për shqyrtim të këtyre draf-ligjeve, të kërkohet edhe përfshirja e anëtarëve nga gjyqësori në grupet punuese të Ministrisë së Drejtësisë, të cilat janë duke punuar në draftimin e ligjeve përkatëse.